ປ່າໄມ້ເປັນພື້ນທີ່ສີຂຽວທີ່ມີລະບົບນິເວດທີ່ຫຼາກຫຼາຍ ເຊິ່ງມີບົດບາດທີ່ສຳຄັນສຳລັບໂລກຂອງພວກເຮົາ ເຊິ່ງມື້ນີ້ທາງ Econox Laos ຈະຂໍນຳສະເໜີ 05 ອັນດັບພື້ນທີ່ປ່າ ທີ່ໃຫຍ່ທີ່ສຸດໃນໂລກ ແລະ ມີຄວາມຫຼາກຫຼາຍທາງດ້ານຊີວະນາໆພັນທີ່ມີເອກະລັກສະເພາະເຂດ.

ເລີ່ມຕົ້ນດ້ວຍປ່າຝົນອະເມຊອນ ເຊິ່ງມີຊື່ເອີ້ນຂານກັນວ່າ ເປັນອັນຍະມະນີ ແຫ່ງຄວາມຫຼາກ ຫຼາຍຂອງຊີວະນາໆພັນ (Amazon Rainforest: the crown jewel of biodiversity).

ປ່າອະເມຊອນ ເປັນປ່າຝົນເຂດຮ້ອນທີ່ໃຫຍ່ທີ່ສຸດໃນໂລກ ໂດຍມີພື້ນທີ່ກວມເອົາ 6,7 ລ້ານຕາລາງກິໂລແມັດ, ອຸດົມສົມບູນໄປດ້ວຍພືດຫຼາຍກວ່າ 40,000 ສາຍພັນ ແລະ ສັດຫຼາກຫຼາຍຊະນິດ, ເຊິ່ງພົບເຫັນໄດ້ຍາກໃນພື້ນທີ່ອື່ນ. ແຫຼ່ງຄວາມຫຼາກຫຼາຍດ້ານຊີວະນາໆພັນນີ້ ເປັນເສົາຫຼັກສຳຄັນໃນການຮັກສາ ຄວາມສົມດຸນຂອງສະພາບອາກາດ ແລະ ເປັນແຫຼ່ງທີ່ຢູ່ອາໄສຂອງຊຸມຊົນພື້ນເມືອງ. ນອກຈາກນີ້, ຍັງມີແມ່ນ້ຳອະເມຊອນໄຫຼຜ່ານໃຈກາງ ເຊິ່ງຊ່ວຍຮັກສາລະບົບນິເວດທາງນ້ຳໃຫ້ມີຄວາມອຸດົມສົມບູນ ແລະ ຫຼໍ່ລ້ຽງສັດຫຼາຍສາຍພັນທີ່ສຳຄັນເຊັ່ນ: ເສືອຈາກົວ (jaguars), ນົກມາຄໍ (macaws) ແລະ ໂລມາແມ່ນ້ຳສີບົວ (pink river dolphin).

ຕາມຕິດມາດ້ວຍ, ປ່າຝົນຄອງໂກເປັນພື້ນທີ່ອຸດົມສົມບູນ (Oasis) ໃນອາຟຣິກາກາງ (Congo Rainforest: an oasis in Central Africa).

ປ່າຝົນຄອງໂກ ຫຼື ເອີ້ນອີກຊື່ໜຶ່ງວ່າ: ປ່າຝົນອາຟຣິກາກາງ ມີການແຜ່ຂະຫຍາຍໄປທົ່ວຫຼາຍປະເທດ ແລະ ມີເນື້ອທີ່ປະມານ 1,6 - 2 ລ້ານຕາລາງກິໂລແມັດ, ໂດຍພື້ນທີ່ສ່ວນໃຫຍ່ແມ່ນຢູ່ເຂດຂອງປະເທດສາທາລະນະລັດປະຊາທິປະໄຕຄອງໂກ. ປ່າແຫ່ງນີ້ເປັນພື້ນທີ່ອາໄສຂອງສັດປ່າຫຼາກຫຼາຍຊະນິດ ລວມເຖິງ ກຣິລາ (gorillas), ຊ້າງປ່າ ແລະ ນົກທີ່ນັບບໍ່ຖ້ວນ. ນອກຈາກນີ້, ຍັງມີແມ່ນ້ຳຄອງໂກທີ່ໄຫຼຜ່ານຈຸດໃຈກາງເຂດປ່າ ເຊິ່ງຊ່ວຍຮັກສາສະພາບແວດລ້ອມທາງນ້ຳ. ປ່າຝົນຄອງໂກເປັນເຂດຮັກສາພັນພືດກວ່າ 10,000 ສາຍພັນ ແລະ ປ່າແຫ່ງນີ້ມີຄວາມສຳຄັນ ຕໍ່ການດຳລົງຊີວິດຂອງປະຊາຊົນຫຼາຍລ້ານຄົນ, ລວມທັງຊຸມຊົນພື້ນເມືອງ.

ປ່າຝົນນິວກີນີ ຫຼື ຮູ້ຈັກກັນໃນນາມ ສະຫວັນແຫ່ງເຂດຮ້ອນ (New Guinea Rainforest: a tropical paradise).

ຕັ້ງຢູ່ເທິງເກາະທີ່ໃຫຍ່ເປັນອັນດັບສອງຂອງໂລກ ເຕັມໄປດ້ວຍຄວາມອຸດົມສົມບູນ ແລະ ຄວາມຫຼາກຫຼາຍທາງຊີວະນາໆພັນ, ເຊິ່ງປ່າຝົນນິວກີນີ ໄດ້ກວມເອົາພື້ນທີ່ປະມານ 786,000 ຕາລາງກິໂລແມັດ ເຊິ່ງທຽບເທົ່າ 70 ສ່ວນຮ້ອຍຂອງພື້ນທີ່ທັງໝົດ. ປ່າຝົນນິວກິນີເປັນປ່າທີ່ມີພັນພືດອຸດົມສົມບູນຫຼາຍເຖິງ 13,000 ສາຍພັນ. ໃນນີ້,​ ປະກອບມີກ້ວຍໄມ້ພັນທີ່ຫາຍາກ ແລະ ເປັນແຫຼ່ງທີ່ຢູ່ອາໄສຂອງສັດສາຍພັນຫາຍາກ ແລະ ມີສະເພາະໃນທ້ອງຖິ່ນນັ້ນ ເຊັ່ນວ່າ: ຈິງໂຈ້ (tree kangaroo) ແລະ ນົກ (vibrant bird of paradise) ອີກດ້ວຍ. ປ່າຝົນນິວກີນີຍັງເປັນສະຖານທີ່ສຳລັບນັກວິທະຍາສາດທີ່ສຶກສາວິວັດທະນາການຂອງລະບົບນິເວດ. ນອກຈາກນີ້, ປ່າດັ່ງກ່າວມີຊື່ສຽງໃນເລື່ອງສັດປ່າທີ່ມີເອກະລັກເຊັ່ນ: ນົກ (Vogelkop bowerbird) ທີ່ຂຶ້ນຊື່ເລື່ອງການປະສົມພັນທີ່ຊັບຊ້ອນ ແລະ ແມງກະເບື້ອໃຫຍ່ທີ່ສຸດໃນໂລກ ແມ່ນແມງກະເບື້ອ (the Queen Alexandra's birdwing).

ນອກຈາກນີ້, ຍັງມີປ່າຝົນບໍນຽວ ທີ່ເປັນ ປ່າອຸດົມສົມບູນໄປດ້ວຍຊີວະນາໆພັນ (Borneo Lowland Rainforest).

ເກາະບໍນຽວເປັນເກາະທີ່ໃຫຍ່ເປັນອັນດັບສາມຂອງໂລກ ແລະ ປ່າຝົນບໍນຽວມີເນື້ອທີ່ 428,438 ຕາລາງກິໂລແມັດ ເຊິ່ງໄດ້ກວມເອົາພື້ນທີ່ຫຼາຍກວ່າເຄິ່ງໜຶ່ງຂອງພື້ນທີ່ທັງໝົດ. ປ່າຝົນແຫ່ງນີ້ຕັ້ງຢູ່ໃນຂອບເຂດຂອງ 3 ປະເທດ ໄດ້ແກ່ ປະເທດບຣູໄນດາຣູຊາລາມ, ປະເທດອິນໂດເນເຊຍ ແລະ ປະເທດມາເລເຊຍ. ປ່າຝົນບໍນຽວເປັນທີ່ຢູ່ອາໄສຂອງພືດພັນ 1,000 ຊະນິດ, ລວມເຖິງກ້ວຍໄມ້ຫຼາຍກວ່າ 2,000 ຊະນິດ. ນອກຈາກນີ້, ຍັງມີສັດທີ່ສຳຄັນປະເພດຕ່າງໆເຊັ່ນ: ຊ້າງອາຊີ, ແຂ້, ນົກເງືອກ ແລະ ລິງລົມ.

ມາເຖິງປ່າສຸດທ້າຍໃນມື້ນີ້ ເຊິ່ງນັ້ນກໍຄື ປ່າຝົນເຂດອົບອຸ່ນຂອງວັດດິວຽນ ເຊິ່ງຖືວ່າເປັນ ສົມບັດທາງທຳມະຊາດໃນອາເມຣິກາໃຕ້ (Valdivian Temperate Rainforest: nature's treasure in South America)

ປ່າດັ່ງກ່າວມີພື້ນທີ່ຕັ້ງຢູ່ໃນເຂດທາງຕອນໃຕ້ຂອງປະເທດ ຊິເລ ແລະ ອາກຊັງຕິນ ເປັນແຫຼ່ງລວມຄວາມຫຼາກຫຼາຍຂອງພືດ ແລະ ສັດທີ່ມະຫັດສະຈັນ. ປ່າດັ່ງກ່າວນີ້ມີເນື້ອທີ່ 248,100 ຕາລາງກິໂລແມັດ. ໃນປ່ານີ້, ມີພຶດພັນຫຼາກຫຼາຍຊະນິດທີ່ມີຊື່ສຽງ ໂດຍສະເພາະແມ່ນຕົ້ນໄມ້ທີ່ມີຢູ່ສະເພາະຖິ່ນກໍຄື Fitzroya cupressoides ທີ່ເອີ້ນທົ່ວໄປວ່າ ຕົ້ນ Alerce ເຊິ່ງສາມາດຢູ່ໄດ້ເຖິງ 3,000 ປີ ແລະ ເປັນພັນໄມ້ທີ່ໃຫຍ່ທີ່ສຸດໃນອາເມຣິກາໃຕ້. ນອກຈາກນີ້, ປ່າວັລດິວຽນຍັງເປັນທີ່ຢູ່ອາໄສຂອງກວາງ huemul ເຊິ່ງເປັນສັດໃກ້ສູນພັນ ແລະ ຍັງເປັນແຫຼ່ງທີ່ຢູ່ອາໄສຂອງນົກສາຍພັນຫາຍາກເຊັ່ນ: ນົກຫົວຂວານ (Magellanic) ອີກດ້ວຍ.

ທັ້ງນີ້, ບໍ່ພຽງແຕ່ 05 ພື້ນທີ່ປ່າທີ່ກ່າວມາຂ້າງເທິງເທົ່ານັ້ນ ທີ່ມີຄວາມສຳຄັນ, ແຕ່ປ່າໄມ້ທຸກແຫ່ງໃນທົ່ວໂລກ ລ້ວນແຕ່ມີບົດບາດ ແລະ ມີຄວາມຈຳເປັນ, ບໍ່ວ່າຈະໃຫຍ່ ຫຼື ນ້ອຍ, ລ້ວນແຕ່ອຸດົມສົມບູນໄປດ້ວຍພືດພັນ ແລະ ສັດທີ່ເປັນເອກະລັກສະເພາະຂອງເຂດພື້ນທີ່ ແລະ ຍັງເປັນບ່ອນສະໜອງທີ່ຢູ່ອາໄສ ແລະ ອາຫານໃຫ້ກັບມະນຸດ ແລະ ສັດ.

ເນື່ອງໃນໂອກາດວັນປ່າໄມ້ສາກົນ ທີ່ກົງກັບວັນທີ 21 ມີນາ ຂອງທຸກໆປີ, ທາງ Econox Laos ຂໍເປັນສ່ວນໜຶ່ງໃນການສົ່ງມອບຄວາມຮູ້ກ່ຽວກັບ ປ່າທີ່ສຳຄັນໃນໂລກທັ້ງ 5 ແຫ່ງນີ້ເພື່ອເປັນ ການປູກຈິດສຳນຶກໃນການຕະໜັກຮູ້ເຖິງຄຸນຄ່າ, ຄວາມສຳຄັນຂອງຊັບພະຍາກອນທຳມະຊາດ ທີ່ມີບົດບາດສຳຄັນໃນການຮັກສາຄວາມສົມດຸນຂອງລະບົບນິເວດ ແລະ ຄວາມຫຼາກຫຼາຍຂອງຊີວະນາໆພັນ, ຊ່ວຍສະໜອງການດຳລົງຊີວິດ ແລະ ຮັບຮອງຄວາມຍືນຍົງທາງດ້ານສະບຽງອາຫານ ດັ່ງຫົວຂໍ້ການສະເຫຼີມສະຫຼອງໃນປີນີ້ທີ່ວ່າ “ປ່າໄມ້ ແລະ ອາຫານ”.

#InternationalDayOfForests #GreenFuture #sustainableearth #EconoxLaos