ດິນບໍລິເວນນ້ຳຖືເປັນໜຶ່ງໃນ​ລະບົບ​ນິເວດ​ທີ່​ມີ​ຄຸນຄ່າ​ ແລະ ມີຄວາມຫຼາກຫຼາຍທາງດ້ານ ຊີວະນາໆພັນທີ່ ຫຼາຍທີ່ສຸດໃນໂລກ, ຖືກກຳນົດວ່າເປັນທັງລະບົບນິເວດນ້ຳຈືດ ແລະ ແຄມຝັ່ງທະເລ, ທະເລເຊິ່ງລວມມີທະເລສາບ, ແມ່ນ້ຳທັງໝົດ, ບຶງ, ປ່າດົງ, ປາກແມ່ນ້ຳ, ທົ່ງພຽງແມ່ນ້ຳຂອງ, ປ່າດົງດິບ, ແນວປະກາລັງ, ແລະ ນ້ຳໃຕ້ດິນ.

ດິນບໍລິເວນນ້ຳມີບົດບາດ​ສຳຄັນ​ໃນ​ການສ້າງຄວາມ​ສົມດຸນໃຫ້​ສິ່ງ​ແວດ​ລ້ອມ, ໂດຍເປັນແຫຼ່ງທີ່ຢູ່ອາໄສຂອງຄົນ, ພືດ, ແລະ ສັດທີ່ມີລັກສະນະສະເພາະ, ເປັນພື້ນທີ່ໃນການເຊື່ອມຕໍ່ລະຫວ່າງດິນ ແລະ ນໍ້າ, ສາມາດສະຫນອງ ສະໜອງອາຫານໃຫ້ແກ່ສິ່ງທີ່ມີຊິວິດ ແລະ ມະນຸດ. ນອກຈາກນີ້, ຍັງຊ່ວຍໃນການກັ່ນຕອງນ້ຳ, ການຄວບຄຸມນ້ຳຖ້ວມ, ການຫຼຸດຜ່ອນການປ່ຽນແປງຂອງດິນຟ້າອາກາດ ເນື່ອງຈາກເປັນພື້ນທີ່ເກັບກາກບອນ ທີ່ເກັບໄດ້ຫຼາຍກວ່າພື້ນທີ່ປ່າຝົນເຖິງ 50 ເທົ່າ.

ວັນດິນບໍລິເວນນ້ຳໂລກໄດ້ຈັດຂຶ້ນໃນ​​ວັນ​ທີ 2 ກຸມ​ພາ​ຂອງ​ທຸກໆປີ. ວັນດັ່ງກ່າວມີຈຸດປະສົງ ເພື່ອປູກຈິດສຳນຶກກ່ຽວກັບຄວາມສຳຄັນຂອງເຂດດິນບໍລິເວນນ້ຳ. ໃນປີ 2025 ນີ້ ໄດ້ເນັ້ນໃຫ້ເຫັນເຖິງຄວາມເລັ່ງດ່ວນໃນການປູກຈິດສຳນຶກ ເພື່ອທົບທວນຕໍ່ກັບການສູນເສຍພື້ນທີ່ ທີ່ເກີດຂຶ້ນຢ່າງໄວວາ ແລະ ສົ່ງເສີມໃຫ້ມີການອະນຸລັກ ແລະ ຟື້ນຟູດິນບໍລິເວນນ້ຳ.

ເຖິງຢ່າງໃດກໍຕາມ ພື້ນທີ່ດິນດັ່ງກ່າວ ກໍເປັນພື້ນທີ່ທີ່ຖືກທຳລາຍ ແລະ ຖືກບຸກລຸກທີ່ຫຼາຍທີ່ສຸດ. ມີເນື້ອທີ່ຫຼາຍກວ່າ 35% ຂອງດິນບໍລິເວນນ້ຳໃນທົ່ວໂລກ ໄດ້ຖືກທຳລາຍ ແລະ ຈຳນວນຊີວະນາໆພັນນ້ຳຈືດ ລວມທັງສັດນ້ຳຕ່າງໆ ທີ່ອາໄສຢູ່ໃນເຂດພື້ນທີ່ດິນບໍລິເວນນ້ຳ ໄດ້ຫຼຸດລົງສູງເຖິງ 85% ນັບແຕ່ປີ 1970.

ສປປ ລາວ ໄດ້ມີການກຳນົດ ການນຳໃຊ້ດິນບໍລິເວນນ້ຳ ເຊິ່ງຕ້ອງຮັບປະກັນຕາມເງື່ອນໄຂ ທີ່ໄດ້ບັນຍັດຕາມດຳລັດວ່າດ້ວຍດິນບໍລິເວນນ້ຳ ສະບັບເລກທີ 350 ປີ 2023 ທັງນີ້ກໍເພື່ອຮັບປະກັນການນຳໃຊ້ຢ່າງຍືນຍົງ. ບັນດາຂໍ້ກຳນົດຕ່າງໆແມ່ນມີລາຍລະອຽດດັ່ງຕໍ່ໄປນີ້:

ບໍ່ໃຫ້ມີການເຊາະເຈື່ອນ.

ບໍ່ໃຫ້ຕັນທາງນ້ຳໄຫຼ.

ບໍ່ໃຫ້ນ້ຳຕື່ນເຂີນ ຫຼື ອັ່ງຖ້ວມ.

ບໍ່ໃຫ້ຖິ້ມສິ່ງເສດເຫຼືອ ແລະ ສິ່ງເປັນພິດລົງສູ່ແຫຼ່ງແມ່ນ້ຳ.

ບໍ່ໃຫ້ຕັດຕົ້ນໄມ້ທຳລາຍປ່າໃນເຂດແຫຼ່ງນ້ຳ.

ບໍ່ໃຫ້ຂຸດລອກເອົາ ດິນຖ່ານຕົມ, ດິນດຳ, ດິນດາກ, ດິນຊາຍ ແລະ ດິນອື່ນໆ.

#WorldWetlandsDay #sustainability #biodiversity