ໃນປະຈຸບັນສັດປ່າຫຼາຍຊະນິດເລີ່ມມີຈຳນວນທີ່ຫຼຸດໜ້ອຍຖອຍລົງ ແລະ ມີຄວາມສ່ຽງຕໍ່ການທີ່ຈະສູນພັນໃນອະນາຄົດ, ເຊິ່ງສາເຫດຫຼັກເກີດຈາກການກະທຳຂອງມະນຸດ ທີ່ໄດ້ມີການແຊກແຊງເຂົ້າໄປທຳລາຍບຸກລຸກຖິ່ນທີ່ຢູ່ອາໄສ, ມີການລ່າ ເພື່ອນຳມາບໍລິໂພກ, ຄ້າ–ຂາຍ ແລະ ສ່ວນຫນຶ່ງແມ່ນເກີດຈາກການປ່ຽນແປງຂອງດິນຟ້າອາກາດ.

ສັດປ່າ ແມ່ນສິ່ງທີ່ມີຊີວິດທີ່ເຕີບໃຫຍ່ ແລະ ອາໄສຢູ່ໃນທຳມະຊາດ, ເຊິ່ງທັງສອງຕ້ອງຄຽງຄູ່ກັນໄປຂາດສິ່ງໃດສິ່ງໜຶ່ງໄປບໍ່ໄດ້. ບໍ່ວ່າຈະເປັນສັດປ່າຂະໜາດນ້ອຍຫາຂະໜາດໃຫຍ່ ຍ່ອມມີບົດບາດທີ່ສຳຄັນໃນການຮັກສາຄວາມສົມດຸນຂອງລະບົບນິເວດ, ເປັນສ່ວນໜຶ່ງທີ່ສຳຄັນຂອງລະບົບຕ່ອງໂສ້ອາຫານ, ສັດປ່າທີ່ເປັນນັກລ່າ ຊ່ວຍຄວບຄຸມຈຳນວນປະຊາກອນທີ່ຖືກລ່າ ປ້ອງກັນບໍ່ໃຫ້ມີປະຊາກອນສັດທີ່ຫຼາຍຈົນເກີນໄປ. ນອກຈາກນັ້ນ, ຍັງມີບົດບາດໃນການຂະຫຍາຍພັນພືດ ແລະ ສາມາດຊ່ວຍຟື້ນຟູທຳມະຊາດໄດ້.

ເພື່ອເປັນການຕະໜັກເຖິງຄວາມສຳຄັນຂອງສັດປ່າ, ໃນວັນທີ 4 ທັນວາຂອງທຸກໆປີ ຈຶ່ງໄດ້ຖືເອົາມື້ດັ່ງກ່າວເປັນ “ວັນອະນຸລັກສັດປ່າໂລກ” ເພື່ອສົ່ງເສີມການປົກປັກຮັກສາສັດປ່າທີ່ໃກ້ຈະສູນພັນ ແລະ ຜັນຂະຫຍາຍຄວາມໝາຍຄວາມສຳຄັນຂອງສັດປ່າຕໍ່ລະບົບນິເວດ. ພ້ອມດຽວກັນນັ້ນ, ກໍຍັງເປັນການປຸກລະດົມ ແລະ ຊຸກຍູ້ໃຫ້ປະຊາຊົນມີການເຄື່ອນໄຫວເພື່ອປົກປ້ອງສັດປ່າທີ່ໃກ້ຈະສູນພັນ.

#WorldWildlifeConservationDay #SaveWildlife #WildlifeProtection #sustainability