World River Dolpin Day

ໃນໂລກຂອງເຮົາມີປາຂ່າທີ່ອາໄສຢູ່ໃນແຫຼ່ງນໍ້າຈືດ 6 ສາຍພັນ ເຊິ່ງໜຶ່ງໃນນັ້ນ ແມ່ນເຄີຍມີຢູ່ໃນປະເທດລາວກ່ອນທີ່ຈະສູນພັນໄປກໍຄື ປາຂ່າ ຫຼື ປາໂລມານໍ້າຈືດອິຣະວະດີ (Irrawaddy River Dolphin).

ປາຂ່າ ແມ່ນເປັນໜຶ່ງໃນຊະນິດສັດນໍ້າທີ່ນອນຢູ່ໃນບັນຊີອະນຸລັກສັດນໍ້າສັດປ່າບັນຊີທີ 1 ແລະ ຍັງເປັນສັດທີ່ໃກ້ຈະສູນພັນໃນບັນຊີແດງຂອງອົງການ IUCN.

ປາຂ່ານໍ້າຈືດມີຄວາມສໍາຄັນຫຼາຍຕໍ່ລະບົບນິເວດ. ການມີຢູ່ຂອງປາຂ່າສະແດງເຖິງແຫຼ່ງທີ່ຢູ່ອາໄສຂອງສັດນໍ້າທີ່ມີສຸຂະພາບດີ, ບົ່ງບອກເຖິງຄຸນະພາບຂອງແມ່ນໍ້າ ແລະ ຫ່ວງໂຊ້ອາຫານທີ່ໝັ້ນຄົງ ເພາະປາຂ່າມີສ່ວນຊ່ວຍໃນການຄວບຄຸມຈໍານວນປະຊາກອນປາ.

ອີງຕາມຂໍ້ມູນຂອງອົງການກອງທຶນອະນຸລັກທໍາມະຊາດໂລກ, ປາຂ່າ ໃນແມ່ນໍ້າຂອງແມ່ນຄາດວ່າເຫຼືອພຽງປະມານ 92 ໂຕເທົ່ານັ້ນ.

ການຫາປາທີ່ຫຼາຍເກີນໄປ ໂດຍສະເພາະແມ່ນການໃຊ້ມອງ, ການໃຊ້ໄຟຟ້າ ແລະ ລະເບີດໃນການຫາປາ, ການສ້າງເຂື່ອນ, ລະບົບຊົນລະປະທານ ແລະ ມົນລະພິດຂອງຂີ້ເຫຍື້ອປລາສຕິກ ແມ່ນສາເຫດຫຼັກທີ່ເຮັດໃຫ້ຈໍານວນປະຊາກອນປາຂ່າຫຼຸດລົງ.

ເປັນສິ່ງທີນ່າເສຍດາຍຫຼາຍທີ່ປາຂ່າໂຕສຸດທ້າຍໃນລາວແມ່ນໄດ້ເສຍຊີວິດລົງ ໃນວັນທີ 15 ກຸມພາ 2022 ເຊິ່ງເປັນສິ່ງທີບົ່ງບອກວ່າປາຂ່າໃນລາວແມ່ນໄດ້ສູນພັນໄປແລ້ວ.

ດັ່ງນັ້ນ, ໃນວັນທີ 24 ຕຸລາ ຂອງທຸກໆປີເພື່ອເປັນການສະເຫຼີມສະຫຼອງວັນປາຂ່າໂລກ. ເຖິງແມ່ນວ່າປາຂ່າໃນ ສປປ ລາວ ໄດ້ສູນພັນໄປແລ້ວ, ພວກເຮົາກໍຢາກໃຫ້ທຸກຄົນມາອະນຸລັກສັດນໍ້າທີ່ໃກ້ຈະສູນພັນ ເພື່ອໃຫ້ແມ່ນໍ້າທີ່ພວກເຮົານໍາໃຊ້ຢູ່ມີຄວາມອຸດົມສົມບູນ ແລະ ຍືນຍົງ.