ບຸນປີໃໝ່ລາວ ເປັນງານບຸນປະເພນີທີ່ມີການສະເຫຼີມສະຫຼອງຢ່າງຟົດຟື້ນຕັ້ງແຕ່ເໜືອເຖິງໃຕ້, ເຊິ່ງໄດ້ຈັດຂຶ້ນໃນທຸກໆປີ ເລີ່ມແຕ່ວັນທີ 14 ຫາ 16 ເດືອນເມສາ. ເທສະການສຳຄັນນີ້ບໍ່ໄດ້ມີການຈຳກັດຢູ່ພຽງ ແຕ່ປະເທດລາວເທົ່ານັ້ນ, ແຕ່ບັນດາປະເທດໃກ້ຄຽງເຊັ່ນ: ປະເທດໄທ, ກຳປູເຈຍ ແລະ ມຽນມາ ກໍໄດ້ມີການສະເຫຼີມສະຫຼອງ ປະເພນີດັ່ງກ່າວໃນລັກສະນະທີ່ຄ້າຍກັນ ຂຶ້ນກັບບໍລິບົດຂອງແຕ່ລະທ້ອງຖິ່ນ.

ເມື່ອເວົ້າເຖິງບຸນປະເພນີດັ່ງກ່າວ, ພວກເຮົາມັກຈະຄິດເຫັນການສົງນ້ຳພະ, ການຕົບພະທາດຊາຍ, ແລະ ທີ່ສຳຄັນແມ່ນການຫຼິ້ນນ້ຳ ຊ່ວງອາກາດທີ່ຮ້ອນ ໃນກາງເດືອນເມສາ ເຊິ່ງຖືເປັນໝາກຫົວໃຈຂອງເທສະການນີ້. ແນວໃດກໍຕາມ, ໂລກຂອງພວກເຮົາໃນປະຈຸບັນ ກຳລັງຜະເຊີນໜ້າກັບພາວະໂລກຮ້ອນ ເຊິ່ງທຸກປະເທດທົ່ວ ໂລກຜະເຊີນກັບບັນຫາ “ໄພແຫ້ງແລ້ງ” ສົ່ງຜົນໃຫ້ນ້ຳໃນການອຸປະໂພກ ແລະ ບໍລິໂພກມີຈຳນວນທີ່ຫຼຸດໜ້ອຍລົງ. ພ້ອມນັ້ນ,​ ບັນຫາຂີ້ເຫຍື້ອກໍຍັງເປັນສິ່ງທ້າທ້າຍຕໍ່ກັບເທສະການດັ່ງກ່າວ.

ຈາກຄວາມທ້າທ້າຍເຫຼົ່ານີ້, ພວກເຮົາ Econox Laos ຂໍຖືໂອກາດມາແລກປ່ຽນ ວິທີການຫຼິ້ນປີໃໝ່ແນວໃດ ໃຫ້ເປັນມິດກັບສິ່ງແວດລ້ອມ ແລະ ມີຄວາມຮັບຜິດຊອບຕໍ່ກັບສັງຄົມ ເຊິ່ງປະກອບດ້ວຍ 5 ວິທີ ດັ່ງຕໍ່ໄປນີ້:

ຖືຕຸກນ້ຳ ແລະ ຈອກທີ່ສາມາດໃຊ້ຊ້ຳໄດ້: ເພື່ອເປັນການຫຼີກລ່ຽງ ແລະ ການຫຼຸດຜ່ອນການນຳໃຊ້ຕຸກນ້ຳ ແລະ ຈອກທີ່ເປັນປະເພດ ປລາສຕິກທີ່ນຳໃຊ້ຄັ້ງດຽວ.

ປ່ຽນຈາກການຊື້ປືນສີດນ້ຳໃໝ່ຫັນປ່ຽນມາໃຊ້ໂອ ແລະ ຂັນແທນ ເຊິ່ງສາມາດນຳເອົາໂອ ແລະ ຂັນມາໃຊ້ປະໂຫຍດພາຍໃນຄົວເຮືອນໄດ້ ພາຍຫຼັງຈາກກິດຈະກຳດັ່ງກ່າວ.

ຖິ້ມຂີ້ເຫຍື້ອໃຫ້ຖືກວິທີ: ບັນຫາສິ່ງເສດເຫຼືອຍັງເປັນສິ່ງທ້າທ້າຍໃນທຸກເທສະການ ແລະ ຈະເປັນການດີຖ້າ ພວກເຮົາຊ່ວຍກັນຖິ້ມຂີ້ເຫຍື້ອໃຫ້ຖືກຈຸດ ແລະ ຖືກວິທີ ເຊິ່ງຈະງ່າຍຕໍ່ກັບການຈັດ ການສິ່ງເສດເຫຼືອ.

ຫຼຸດຜ່ອນການຊົມໃຊ້ພາຫະນະຫຼາຍຄັນຫາກໄປສະຖານທີ່ດຽວກັນ:ການເດີນທາງດ້ວຍພາຫະນະເຊື້ອໄຟ ເປັນໜຶ່ງໃນຕົວກໍ່ມົນລະພິດທີ່ສົ່ງຜົນໃຫ້ອາກາດເປັນພິດ ແລະ ກະທົບຕໍ່ການສູດດົມອາກາດ ບໍລິສຸດຂອງພວກເຮົາ. ດ້ວຍເຫດນີ້, ການເດີນທາງຮ່ວມກັນຈຶ່ງເປັນອີກທາງເລືອກໜຶ່ງທີ່ສາມາດປະຫຍັດນ້ຳມັນ ແລະ ຫຼຸດຜ່ອນການປ່ອຍມົນລະພິດ.

ຫຼິ້ນນ້ຳແບບປະຫຍັດ: ໃຊ້ນໍ້າໃນປະລິມານທີ່ເໝາະສົມ, ຈຳກັດເວລາໃນການຊົມໃຊ້ ເພື່ອເປັນການບໍ່ໃຊ້ນ້ຳເກີນຄວາມຈຳເປັນ.

ພຽງແຕ່ 5 ວິທີນີ້ ພວກທ່ານກໍສາມາດມ່ວນຊື່ນກັບບຸນປະເພນີວັດທະນາທຳຂອງພວກເຮົາ ຄຽງຄູ່ການຫຼິ້ນແບບມີຄວາມຮັບຜີດຊອບ ແລະ ໃສ່ໃຈຕໍ່ສິ່ງແວດລ້ອມ.

#Econoxlaos #HappyLaoNewYear #Sustainability #Ecofriendly #ບຸນປີໃໝ່ລາວ