ໃນລະຫວ່າງວັນທີ 21/11/2019 ທີ່ຜ່ານມາທາງ ECONOX ໄດ້ມີກິດຈະກໍາບວດປ່າຕົ້ນນໍ້າ ໃນບໍບວິເວນແຫລ່ງທ່ອງທ່ຽວ ຕາດແກ້ງຍຸຍ, ບ້ານນາດ້ວງ, ເມືອງວັງວຽງ ແຂວງວຽງຈັນ ເຊິ່ງເປັນກິດຈະກໍາລັກຂອງໂຄງການ SCoPA ຮ່ວມກັບເຈົ້າຂອງໂຄງການກໍ່ຄື ບ້ານນາດ້ວງ ພາຍໃຕ້ການຊີ້ນໍານາພາຂອງທີ່ປຶກສາ FCEC

- ໃນພື້ນທີ່ 100 ຮຕ ຂອງປ່າສະຫງວນທີ່ເປັນປ່າຕົ້ນນໍ້າຂອງຕາດແກ້ງຍຸຍ ແລະ ຍັງເປັນແຫລ່ງນໍ້າທີ່ຜະລິດນໍ້າປະປາໃຊ້ຂອງທົ່ວເມືອງວັງວຽງ ແຕ່ກ່ອນພື້ນປ່າແຫ່ງນີ້ເຄີຍຖືກຄຸກຄາມຈາກໄຟປ່າເຮັດໃຫ້ປ່າບໍລິເວນນີ້ຖືກທໍາລາຍໄປໃນສ່ວນຫນຶ່ງ ປັດຈຸບັນພື້ນທີ່ປ່າແຫ່ງນີ້ໄດ້ຮັບການຟື້ນຟູ ແລະ ປົກປັກຮັກສາໂດຍພໍ່ແມ່ປະຊາຊົນ ບ້ານນາດ້ວງ ທີ່ເປັນແຫລ່ງທໍາມາຫາກິນຂອງປະຊາຊົນສ່ວນທີ່ຍັງເອື່ອຍອີງທໍາມະຊາດ ໃນການຫາເຄື່ອງປ່າຂອງດົງ ແລະ ສະບຽງອາຫານ.

- ເມື່ອເຫັນໄດ້ເຖິງຄວາມສໍາຄັນຂອງປ່າໄມ້ທີ່ປະຈຸບັນເລີ່ມຫລຸດນ້ອຍລົງບໍ່ສະເພາະແຕ່ໃນປະເທດເຮົາກໍ່ຄືໃນທົ່ວໂລກ ທີ່ປະສົບບັນຫາກ່ຽວກັບການປ່ຽນແປງຂອງດິນຟ້າອາກາດ ໃນສ່ວນຂອງພື້ນທີ 100ຮຕ ຂອງປ່າໃນບໍລິເວນນີ້ ທີ່ໄດ້ມີການບວດປ່າ (ທາງດ້ານສາສະຫນາ) ກໍ່ຄືການສ້າງພື້ນທີ່ເຂດປ່າສະຫງວນຂອງຊຸມຊົນ ເພື່ອເປັນການອະນຸລັກຮັກສາ ແລະ ມີຂະບວນການຈັດການທີ່ມີລະບົບຂຶ້ນ ແລະ ກໍານົດກົດລະບຽບການຄຸ້ມຄອງ ແລະ ນໍາໃຊ້ເພື່ອໃຫ້ມັນຢືນຍົງ

- ບໍ່ສະເພາະແຕ່ບໍລິເວນປ່າທີ່ໄດ້ສະຫງວນພື້ນທີ່ໄວ້ ໃນບໍລິເວນແຫລ່ງທ່ອງທ່ຽວ (ຕາດແກ້ງຍຸຍ) ກໍ່ໄດ້ມີການກໍານົດກົດລະບຽບໃຫ້ກັບນັກທ່ອງທ່ຽວ ແລະ ປະຊາຊົນທີ່ເຂົ້າມານໍາໃຊ້ພື້ນທີ່ ໃຫ້ເປັນການທ່ອງທ່ຽວແບບອານຸລັກ ນິເວດວິທະຍາ ຄຽງຄູ່ກັບການປົກປັກຮັກສາ ບໍ່ວ່າຈະເປັນພື້ນທີ່ວັງສະຫງວນ

- ເຊິ່ງໄດ້ມີຫລາຍພາກສ່ວນເຂົ້າຮ່ວມພິທີບວດປ່າເຊັ່ນວ່າ: ທ່ານຮອງເຈົ້າເມືອງ ເມືອງວັງວຽງ, ຕົວແທນຈາກບັາດາຫ້ອງການ ແລະ ຂະແຫນງການທີ່ກ່ຽວຂ້ອງ, ຕົວແທນຂອງຜູ້ໃຫ້ທຶນ ກອງທຶນສິ່ງແວດລ້ອມໂລກແຜນງານໂຄງການຂະຫນາດນ້ອຍ SGP gef UNDP ປະຈໍາ ສປປລາວ, ປະຊາຊົນບ້ານນາດ້ວງ ແລະ ບ້ານອ້ອມຂ້າງ, ທີ່ປຶກສາໂຄງການ ມສພອ ລວມທັງທີມງານວິຊາການ ແລະ ນ້ອງໆອາສາສະຫມັກຈາກ ECONOX

ເມື່ອວຽກງານປົກປັກຮັກສາ ແລະ ການພັດທະນາ ບໍ່ແມ່ນຫນ້າທີ່ສະເພາະຂອງບຸກຄົນ ຫລື ກຸ່ມຄົນໃດຫນຶ່ງທີ່ຕ້ອງຂັບເຄື່ອນ ແຕ່ມັນເປັນຫນ້າທີ່ຂອງຫມົດທຸກຄົນບໍ່ວ່າຈະເປັນປະຊາຊົນພາຍໃນບ້ານນາດ້ວງ, ບ້ານອ້ອມຂ້າງ, ອົງການຈັດຕັ້ງທາງສັງຄົມຕ່າງໆ ລວມທັງນັກທ່ອງທ່ຽວທີ່ເຂົາມາຊົມໃຊ້ພຶ້ນທີ່ຕ້ອງໄດ້ປະກອບສ່ວນຊ່ວຍກັນເພື່ອເຮັດໃຫ້ການອະນຸລັກພືນປ່າບໍລິເວນນີ້ມີປະສິດຕິພາບສູງສຸດ ແລະ ສາມາດນໍ້າໃຊ້ໄດ້ຍາວນານ ໃນລຸ້ນຕໍ່ໆໄປ.